Ֆաշիստական Ադրբեջանի իշխանությունները ևս ութ գերեվարված հայերի են դատապարտել երկարաժամկետ ազատազրկման։
Ինչպես հայտնում են ադրբեջանական լրատվամիջոցները, մասնավորապես՝ APA-ն, համաձայն դատավճռի՝ Մելիքսեթ Փաշայանը դատապարտվել է 19 տարվա ազատազրկման, Մադաթ Բաբայանը՝ 19 տարվա, Գարիկ Մարտիրոսյանը՝ 18 տարվա, Դավիթ Ալավերդյանը՝ 16 տարվա, Լևոն Բալայանը՝ 16 տարվա, Վասիլի Բեգլարյանը՝ 15 տարվա, Գուրգեն Ստեփանյանը՝ 15 տարվա և Էրիկ Ղազարյանը՝ 15 տարվա ազատազրկման։
Ավելի վաղ Ադրբեջանի ֆաշիստական ռեժիմի հանցավոր, այսպես կոչված, «դատարանը» անօրինական կերպով դատապարտեց ցմահ ազատազրկման՝ Արցախի (Լեռնային Ղարաբաղի) նախկին նախագահ Արայիկ Հարությունյանին, Արցախի Ազգային ժողովի նախկին նախագահ Դավիթ Իշխանյանին, Արցախի նախկին արտգործնախարար Դավիթ Բաբայանին, Լեռնային Ղարաբաղի պաշտպանության բանակի նախկին գլխավոր հրամանատար գեներալ Լևոն Մնացականյանին և Լեռնային Ղարաբաղի Պաշտպանության բանակի գլխավոր հրամանատարի առաջին տեղակալ գեներալ Դավիթ Մանուկյանին, իսկ Արցախի (Լեռնային Ղարաբաղի) նախկին նախագահ Արկադի Ղուկասյանին և Արցախի (Լեռնային Ղարաբաղի) նախկին նախկին նախագահ Բակո Սահակյանին՝ 20 տարվա ազատազրկման։
Արկադի Ղուկասյանի և Բակո Սահակյանի համար նշանակված պատիժը, որը 20 տարվա ազատազրկում է՝ ցմահ ազատազրկման փոխարեն, պայմանավորված է եղել նրանց 65 տարեկանը լրանալով։
Հիշենք, որ անօրինական ցուցադրական, այսպես կոչված «դատավարությունը» սկսվել է 2025 թվականի հունվարի 17-ին։ Ֆաշիստական ռեժիմի դատախազները պահանջում էին հենց այս դատավճիռը։
Անկախ Արցախի (Լեռնային Ղարաբաղի Հանրապետության) նախկին բարձրագույն ռազմաքաղաքական ղեկավարությունը անօրինական ձերբակալվել է 2023 թվականի սեպտեմբերի վերջին` Ադրբեջանի ֆաշիստական ռեժիմի կողմից 2023 թվականի սեպտեմբերի 19-ին իրականացված լայնածավալ ռազմական ագրեսիայից, էթնիկ զտումներից և Արցախի ամբողջ 120,000 բնիկ հայ բնակչության բռնի տեղահանությունից անմիջապես հետո։
