2012 թ. հոկտեմբերի 25-ին Ավստրալիայի Նոր Հարավային Ուելս ամենամեծ նահանգի խորհրդարանի օրենսդիր խորհուրդն ընդունել է բանաձեւ, որով ճանաչում է Լեռնային Ղարաբաղի անկախությունը եւ նրա ժողովրդի ինքնորոշման իրավունքը: Ինչպես «Արմենպրես»-ին տեղեկացրին Ավստրալիայի Հայ դատի հանձնախմբից, հոկտեմբերի 25-ին միաձայն բանաձեւի ընդունումն Ավստրալիայի Հայ դատի հանձնախմբի երկար ամիսների քարոզարշավի եւ տքնաջան աշխատանքի շնորհիվ է: Այն Ներկայացուցիչների պալատին ներկայացրել է Օրենսդիր խորհրդի անդամ Մարի Ֆիկարան, ով հայակական հարցերի վաղեմի ջատագովն է եւ աջակիցը: Բանաձեւը ճանաչում է Լեռնային Ղարաբաղի Հանրապետության անկախության 20 ամյակը, այն աջակցում է հանրապետության ժողովրդի ինքնորոշման իրավունքին եւ կոչ է անում «Ավստրալիայի Ներկայացուցիչների պալատին պաշտոնապես ճանաչել Լեռնային Ղարաբաղի Հանրապետությունը եւ ամրապնդել Ավստրալիայի հարաբերությունները ԼՂ եւ նրա ժողովրդի հետ»:
Ավստրալիայի Հայ դատի հանձնախմբի գործադիր տնօրեն Վահե Ղահրամանյանը եւ հանձնախմբի կապի տնօրեն Հայկ Կայսերյանը ներկա են գտնվել այդ պատմական նախաձեռնության ընդունմանը: «Լեռնային Ղարաբաղի հարցը եղել է հանձնախմբի վերջին ժամանակաշրջանի գործունեությունների կիզակետում: Նոր Հարավային Ուելսի խորհրդարանը մշտապես եղել է եւ շարունակում է մնալ մարդու իրավունքներն առաջ մղելու հույսի փարոս: Մենք մեր երախտագիտությունն ենք հայտնում Օրենսդիր խորհրդի բոլոր անդամներին, ովքեր պաշտպանում են մարդու ինքնորոշման հիմնարար իրավքունքը: Մասնավորապես, մենք շնորհակալություն ենք հայտնում Մարի Ֆիկարային իր համաձրակ դիրքորոշման համար»,-նշել է Ղահրամանյանը:
Ավստրալիայի Հայ դատի հանձնախմբի նախագահ Գրեգ Սողոմոնյանը եւս միացել է պատմական որոշման ողջույններին:
